Utanríkisráðherra Bandaríkjanna, Marco Rubio, sendi ferðamönnum skýr skilaboð í grein sem hann birti hjá Fox News. Mögum þykir greinin nokkuð fráhrindandi fyrir þá sem íhuga ferðalag til Bandaríkjanna.
„Að heimsækja Bandaríkin er ekki sjálfsagður réttur. Það eru forréttindi sem veitt eru þeim sem virða lög okkar og gildi. Og sem utanríkisráðherra mun ég aldrei gleyma því. Bandarísk lög setja skýrar reglur um hverjir geta og geta ekki komið til Bandaríkjanna.“
Rubio segir að ræðismönnum hans beri skylda til að beita þessum reglum gagnvart hverjum þeirra milljóna ferðamanna sem óska eftir vegabréfsáritun á ári hverju. Þar með þurfi ferðamenn að vera reiðubúnir að sanna að þeir hafi réttinn til að vera í Bandaríkjunum hvenær sem er.
„Við gerum ráð fyrir – og lögin krefjast þess – að allir handhafar vegabréfsáritana sýni fram á hæfi sitt á hverjum degi sem áritun þeirra er í gildi. Þetta felur í sér að virða lög okkar, hegða sér á viðeigandi hátt í samræmi við tegund áritunar sinnar og að halda áfram að uppfylla þessi viðmið allan þann tíma sem þeir dvelja í landi okkar.“
Undanfarna mánuði hafa birst fréttir um ferðamenn sem eru stöðvaðir á flugvöllum í Bandaríkjunum og meinuð innganga í landið nema þeir heimili að láta skoða síma sína, fartölvur og samfélagsmiðla. Ef landamæraverðir finna þar eitthvað sem bendi til þess að ferðamaðurinn sé ekki hrifinn af forseta Bandaríkjanna, Donald Trump, má fólk reikna með því að vera sent beint aftur heim og jafnvel að það verði handtekið og haldið í varðhaldi vikum saman.
Franskur vísindamaður var á leið á ráðstefnu í Houston þegar farsími hans var tekinn og hann rannsakaður. Það fundust samskipti þar sem vísindamaðurinn gagnrýndi Trump og því var honum vísað úr landi.
Þremur meðlimum bresku hljómsveitarinnar UK Subs var meinuð innganga í landið út af færslu bassaleikarans, Alvin Gibbs, á samfélagsmiðlum, þar sem hann gagnrýndi Trump.
Eins hafa ferðamenn lent í því að vera handteknir og haldið vikum saman í haldi fyrir meint brot gegn vegabréfsáritun. Til dæmis ein kona sem hafði komið til Bandaríkjanna oft áður og reddaði sér ókeypis heimagistingu í skiptum fyrir húsverk. Þetta var talið brot gegn vegabréfsáritun þar sem hún hefði verið að vinna án heimildar í Bandaríkjunum.
Önnur endaði í nokkurra vikna varðhaldi fyrir það sama en hún hafði unnið sér það til saka að taka húflúrsgræjur með sér í ferðalagið sem útlendingastofnun Bandaríkjanna þótti benda til þess að hún ætlaði sér að vinna ólöglega í ferðinni.
