Talið er að um 1.300 brúnbirnir séu í Slóvakíu en sambúð þeirra við íbúa landsins hefur ekki verið átakalaus í gegnum árin. Á síðasta ári voru tilkynntar um 1.900 árásir bjarndýra á menn eða bústaði þeirra.
„Við getum ekki lifað í landi þar sem fólk óttast að fara inn í skógi vaxin svæði,“ hefur AP eftir forsætisráðherra landsins, Robert Fico.
Árásin sem vísað er til hér að framan varð um liðna helgi en á sunnudag fannst lík 59 ára karlmanns í skóglendi nærri Detva, í miðhluta landsins. Maðurinn hafði farið í göngu í skóginum og hófst leit að honum þegar hann skilaði sér ekki heim.
Maðurinn var með mikla áverka á höfði og er talið nær öruggt að hann hafi orðið fyrir árás bjarndýrs.
Aðgerðir sem þessar eru ekki einsdæmi í Slóvakíu en í fyrra voru 150 birnir felldir. Er markmið yfirvalda að halda fjölda dýranna í kringum 800 sem er nægjanlegt til að viðhalda stöðugri stofnstærð.
Ákvörðun slóvakískra yfirvalda hefur valdið talsverðu fjaðrafoki, einkum á meðal dýraverndunarsinna sem telja að landið sé að brjóta gegn sáttmála ESB sem kveður á um að einungis megi fella bjarndýr sem ráðist hafa á fólk eða valdið eignatjóni.
Hafa náttúru- og dýraverndunarsamtök bent á að skynsamlegra sé að einblína á fyrirbyggjandi aðgerðir og fræðslu um hvernig fólk getur tryggt öryggi sitt í náttúrunni.
