Rinaldi, sem er búsett í Oklahoma, var í Dallas með hópi vinkvenna þar sem markmiðið var að gæsa hana. Rinaldi var úti að skemmta sér að kvöldi laugardagsins 22. mars þegar ókunnugur karlmaður gekk upp að henni og kýldi hana í andlitið.
Voru vinkonurnar á ferð um klukkan tvö um nótt eftir að hafa verið á skemmtistað og voru þær að ganga í átt að Uber-bifreið sem þær höfðu pantað.
Afleiðingar árásarinnar voru talsverðar því Rinaldi fékk heilahristing, nefbrot, þrjár brotnar tennur og þá þurfti að sauma átta spor í andlit hennar.
„Ég man ekki eftir árásinni, ég man bara eftir því að hafa verið að labba í áttina að bílnum og það næsta sem ég man var þegar ég var komin í sjúkrabíl,“ segir hún í samtali við People.
Maðurinn sem handtekinn var vegna árásarinnar heitir Trevon Woodards. Hann hefur áður komist í kast við lögin vegna líkamsárása.
Söfnun var hrundið af stað fyrir Rinaldi á vefnum GoFundME og hafa rúmir 10 þúsund dollarar, vel á aðra milljón króna, safnast fyrir hana.
Rinaldi var nokkuð brött þegar People ræddi við hana um helgina. Sagði hún að árásin myndi ekki koma í veg fyrir að hún ætli sér að njóta dagsins með sínum heittelskaða þegar þau ganga í hjónaband síðar í þessum mánuði.
