Börn eiga það til að vera með fjörugt ímyndunarafl og sjá oftar en ekki fyrir sér allskonar kynjaverur í myrkrinu fyrir svefninn. Sem betur fer reynist óttinn í langflestum tilfellum ekki á rökum reistur.

Lögreglan í Barton-sýslu í Kansas í Bandaríkjunum fékk óvenjulega tilkynningu á borð til sín á mánudag frá ungri konu sem var að passa barn í húsi í bænum Great Bend.

Í frétt CNN kemur fram að barnið hafi kallað á barnfóstruna þegar það var að reyna að sofna og kvartað undan því að það væri „skrímsli“ undir rúminu. Barnfóstran fór inn í herbergið og freistaði þess að róa barnið niður með því að kíkja sjálf undir rúmið.

Barnfóstrunni brá heldur betur í brún þegar hún sá að óþekktur karlmaður var í felum undir rúminu. Til átaka kom á milli barnfóstrunnar og mannsins sem enduðu þannig að maðurinn lagði á flótta. Hann var handtekinn degi síðar.

Maðurinn, sem er 27 ára, bjó áður í þessu sama húsi. Hann hefur ítrekað komist í kast við lögin að undanförnu og var tiltölulega nýsloppinn úr fangelsi þegar hann var handtekinn í vikunni.