Nemandi við háskólann í Pittsburgh í Bandaríkjunum, tvítug stúlka, hvarf á dularfullan hátt á meðan hún var í fríi með vinum sínum í Dóminíska lýðveldinu. Stúlkan, Sudiskha Konanki var að fagna vorleyfi frá námi með vinkonum sínum þegar hún hvarf fyrr í þessum mánuði.

Málið hefur vakið mikla athygli en yfirvöld í Dóminíska lýðveldinu telja að Konanki hafi drukknað en segja óvíst hvort það hafi verið af slysförum eða hvort glæpur átti sér stað. Konanki sást seinast á ströndinni þar sem hún var að slá sér upp með hinum bandaríska Joshua Riibe. Þau létu vel að hvort öðru í sjónum en svo skall á þeim stór alda. Riibe segir að hann hafi dregið Konaki upp úr sjónum.

Sjá einnig: Rannsaka dularfullt hvarf ungs háskólanema

„Ég reyndi að fá hana til að anda, en þannig náði ég ekki að anda sjálfur og gleypti mikinn sjó,“ sagði Riibe við lögreglu. Þau hafi komist upp á ströndina og þá hafi Riibe fengið sér sæti í strandstól og séð út undan sér að Konanki var í flæðamálinu, með sjó upp að hnjám, og virtist vera að ganga í áttina að staðnum þar sem hún skildi fötin sín eftir. Riibe hafi svo þurft að kasta upp öllum sjónum sem hann gleypti og í kjölfarið hafi hann sofnað eða misst meðvitund. Þegar hann rankaði aftur við sér kallaði hann til Konanki og spurði hvort það væri í lagi með hana. Hann fékk ekkert svar og sá hana hvergi.

Hann hafi því talið að hún hefði farið aftur upp á hótelið sitt. Hann stóð því upp og fór sjálfur upp á hótelherbergi þar sem hann lagði sig án þess að láta vita af þessari erfiðu lífsreynslu þeirra.

Riibe er sagður samstarfsfús en lögregla hefur engu að síður tekið af honum vegabréfið svo hann fari ekki úr landi. Foreldrar unga mannsins, sem er 22 ára háskólanemi, hafa harðlega mótmælt þessu og segja son sinn sæta ósanngjarnri meðferð.

Um helgina var greint frá því að lögregla hafi fundið fatnað og skó á ströndinni sem líklegast tilheyra Konanki. Þannig þykir ólíklegt að hún hafi yfirgefið Riibe á meðan hann var meðvitundarlaus til að fara aftur upp á hótel.

Yfirvöld velta því nú fyrir sér hvort að önnur alda hafi skollið á stúlkunni og dregið hana út á sjó. Riibe hefur þó verið harðlega gagnrýndur fyrir að kanna ekki hvort Konanki hefði skilað sér á hótelið og ekki látið nokkurn mann vita. Eins telja margir að Riibe hafi komið með nokkrar ólíkar útgáfur af atvikum sem sé ekki traustvekjandi. Foreldrar hans lýsa honum þó sem ljúfum dreng sem gæti ekki gert flugu mein.