Þegar þú stendur í búðinni og ert að fara að setja eggjabakka í innkaupakerruna, þá skaltu staldra aðeins við og opna hann og skoða eggin í honum til að sjá hvort einhver egg séu brotin. Það tekur enga stund að opna bakkanna og skoða eggin en þetta getur skipt miklu máli fyrir budduna og heilsuna.

Þetta snýst ekki bara um að fá sem mest fyrir peningana sína, heldur aðallega um heilsu fólks. Egg eru auðvitað dýraafurð og þótt fyllsta hreinlætis sé gætt, þá er hætta á að bakteríur, á borð við salmonellu, sé að finna í þeim.

Eggjaskurnin verndar innihaldið fyrir bakteríum en sprungur í skurninni geta valdið því að bakteríur komist inn í eggið. Þegar þú notar egg við eldamennsku, áttu á hættu að innbyrða hættulegar bakteríur sem geta valdið matareitrun. Salmonella getur valdið magakrampa, niðurgangi, hita og uppköstum og í alvarlegustu tilfellunum getur hún verið lífshættuleg fyrir börn, gamalt fólk og þá sem eru með veikburða ónæmiskerfi.

Það tekur bara nokkrar sekúndur að skoða hvort það séu brotin egg í bakkanum. Opnaðu hann og skoðaðu eggin. Snertu þau varlega og ef þú vilt gera þetta sérstaklega vel, getur þú notað vasaljósið í farsímanum þínum til að lýsa á þau. Þannig sérðu ef það eru litlar sprungur í þeim. Skoðaðu botninn á bakkanum vel, brotin egg leka stundum og þá sést það í botninum.