Mennirnir sem fundust látnir, David Harrington, Ricky Johnson og Clayton McGeeny, voru á aldrinum 36 til 38 ára og höfðu þeir komið saman á heimili fjórða vinarins, Jordan Willis, til að horfa á leik með Kansas City Chiefs í bandarísku NFL-deildinni í amerískum fótbolta.
Sjá einnig: Þrír vinir fundust frosnir í hel í garði fjórða vinarins – Hvað gerðist?
Leikurinn sem um ræðir fór fram að kvöldi 7. janúar í fyrra og skiluðu mennirnir sér ekki heim eftir leikinn. Var það ekki fyrr en 9. janúar að áhyggjufull unnusta McGeeny hafði samband við lögreglu og bað hana að fara heim til Jordans að lík þeirra fundust. Voru þremenningarnir látnir úti í garði og virtust hafa frosið í hel.
Nú hefur lögregla gefið það út að mennirnir létust af völdum fíkniefna en í blóði þeirra fundust bæði kókaín og fentanýl.
Tveir menn hafa verið ákærðir í tengslum við málið og er annar þeirra fjórði vinurinn, Jordan Willis. Hann er talinn hafa látið vini sína fá fíkniefnin til inntöku. Þá hefur maður sem útvegaði Jordan fíkniefnin, Ivory Carson, einnig verið ákærður og eiga þeir báðir þunga fangelsisdóma yfir höfði sér.
Þegar þremenningarnir höfðu ekki skilað sér heim eftir heimsóknina til Willis settu þeir sig í samband við Jordan. Hann gat hins vegar engu svarað um hvað varð um vinina.
Tveimur dögum eftir leikinn knúði lögregla dyra á heimili hans og var hann sagður hafa komið til dyra með rauðvínsglas í hönd – grunlaus um að vinir hans væru látnir. Þremenningarnir fundust svo í garðinum bak við húsið stuttu síðar.
