Liðsmenn Hamas-samtakanna hafa látið Ísraelsmenn fá lík fjögurra gísla sem teknir voru höndum þann 7. október 2023. Talið er að í þeim hópi séu Shiri Bibas og tveggja sona hennar, Ariel og Kfir.

Kfir var aðeins níu mánaða þegar hann var tekinn höndum og var hann sá yngsti sem tekinn var höndum í innrásinni. Ariel var fjögurra ára.

Eiginmaður Shiri og faðir Ariels og Kfir var einnig tekinn en honum var sleppt fyrr í þessum mánuði eftir að hafa verið í haldi Hamas í 16 mánuði.

Hamas-samtökin segja að Shiri, Ariel og Kfir hafi látist í eldflaugaárásum Ísraela „snemma í stríðinu“ en í frétt AP kemur fram að engin sönnun um það liggi fyrir.

Talið er að fjórða líkið sé af hinum 83 ára gamla Oded Lifshitz, fyrrverandi blaðamanni, sem tekinn var höndum á heimili sínu í Nir Oz.

Isaac Herzog, forseti Ísraels, sagði í færslu á X eftir að Ísraelsmenn fengu líkin afhent að hjörtu landsmanna væru í molum yfir örlögum fjórmenninganna.