Indverska ríkisstjórnin hefur ákveðið að auka öryggisgæslu Dalai Lama, sem er andlegur leiðtogi Tíbeta, af ótta við að lífi hans sé ógnað. Munu rúmlega 30 lífverðir gæta hans allan sólarhringinn.

The Independent segir að innanríkisráðherrann hafi tilkynnt í síðustu viku að öryggisgæsla Dalai Lama veðri aukin vegna þess að leyniþjónustan telur að aukin hætta sé á að reynt verði að ráða hann af dögum.

Dalai Lama, sem er 89 ára, mun nú verða gætt af 33 öryggisvörðum allan sólarhringinn. Þeir munu meðal annars annast gæslu við heimili hans í Dharamshala í Himachal Pradesh.

Fram að þessu hefur hann aðeins haft lágmarksöryggisgæslu á heimili sínu en gæslan var aukin þegar hann ferðaðist.

Dalai Lama gerði fjallabæinn Dharamshala að höfuðstöðvum sínum eftir að hann flúði frá Tíbet í kjölfar misheppnaðrar uppreisnar gegn Kínverjum 1959. Útlagastjórn Tíbet heldur einnig til í bænum.

Dalai Lama hlaut Friðarverðlaun Nóbels 1989. Hann er mikill þyrnir í augum kínversku kommúnistastjórnarinnar því fylgjendur hans telja hann vera sameiningarafl Tíbeta innan og utan Kína.

Rúmlega 100.000 tíbeskir flóttamenn búa á Indlandi, Nepal og Bútan.