Skömmu fyrir 25 ára afmælisdaginn sinn var Sharon Kinne ákærð fyrir að hafa myrt eiginmann sinn, eiginkonu unnusta síns og mann sem hún hitti á bar í Mexíkó. Henni tókst síðan að flýja úr kvennafangelsi í Mexíkó í byrjun desember 1969. Eftir það var ekkert vitað um hvar hún hélt sig en mikið hefur verið fjallað um mál hennar í hlaðvörpum, sjónvarpsþáttum og bók hefur verið skrifuð um það.
En nú hefur málið verið leyst að sögn lögreglunnar. The Independent skýrir frá þessu og segir að staðfest hafi verið að Sharon hafi látist af eðlilegum orsökum í Alberta í Kanada í janúar 2022. Þar gekk hún undir nafninu Diedra Glabus.
Lögreglan í Kansas City í Missouri í Bandaríkjunum skýrði frá þessu á fréttamannafundi og sagði um leið frá því að öll mál varðandi hana hafi nú verið felld niður.
Dustin Love, talsmaður lögreglunnar, sagðist gjarnan hafa viljað haft tækifæri til að sitja gegnt henni og ræða við hana. Það hafi verið óheppilegt að ekki tókst að hafa hendur í hári hennar á meðan hún var á lífi en hún hafi verið mjög góð í því sem hún gerði.
Rannsókn lögreglunnar leiddi í ljós að Sharon giftist nokkrum sinnum eftir flóttann úr fangelsinu. Þar á meðal giftist hún manni að nafni James Glabus í Los Angeles. Hún stofnaði nokkrar fjölskyldur og notaði hin ýmsu nöfn. Love sagði að fjölskyldur hennar hafi óskað nafnleyndar og lögreglan virði þær óskir.
Ekki er vitað með vissu hvað hún tók sér fyrir hendur á áttunda áratugnum en hún bjó í Alberta í Kanada frá 1979 að minnsta kosti. Lögreglan er enn að leita upplýsinga um dvalarstaði hennar frá 1969 til 1979.
Lögreglunni tókst að bera kennsl á Sharon vegna fingrafara hennar. Fingraför hennar, sem útfararstofan sem sá um útför hennar tók, pössuðu fullkomlega við fingraför sem voru tekin af henni í tengslum við morðrannsóknirnar.
