Strandgæslan á eyjunum St. Kitts og Nevis, sem eru í Karíbahafi, gerði óhugnanlega uppgötvun þegar farið var um borð í bát nærri strönd eyjanna.

Þrettán lík voru í bátnum og höfðu þau rotnað mjög mikið að sögn Cromwell Henry, aðstoðarlögreglustjóra. Það gerir þessa uppgötvun kannski enn óhugnanlegri að nokkrum dögum áður fundust fimm lík í bát nærri Trínidad og Tóbagó.

Engir áhafnarmeðlimir voru um borð í bátunum.

Lögreglan hefur ekki skýrt frá aldri eða kyni hinna látnu.

Ekki liggur fyrir hvort einhver tengsl séu á milli málanna.

Yfirvöld á Trínidad og Tóbagó segja að báturinn, sem líkin fimm fundust í, líkist mjög báti sem fannst við landið 2021 en fimmtán lík voru um borð í honum. Sú kenning var sett fram þá að um afrískt förufólk hefði verið að ræða.