Höfundar nýrrar bresk/bandarískrar rannsóknar, sem hefur verið ritrýnd, komust að þeirri niðurstöðu að konur séu öflugri en karlar. Einn höfunda hennar segir að konur hafi þróast til að lifa af þar sem engan mat er að hafa.
Rannsóknin byggist meðal annars á gögnum frá Alþjóðaheilbrigðismálastofnuninni WHO. Í henni kemur fram að fólk hækkar og þyngist út frá því hversu gott ástandið er á heimaslóðum þess varðandi næringu og heilbrigði. Einnig kemur fram að karlar eru viðkvæmari fyrir áhrifum uppvaxtarumhverfis síns en konur.
Lewis Halsey, einn höfunda rannsóknarinnar, sagði í samtali við The Guardian að bætt lífsskilyrði í formi matar og færri sjúkdóma hafi „losað okkur úr hlekkjum“.
Í rannsókninni var athyglinni almennt beint að því hvaða áhrif velmegun hefur á hæð og þyngd fólks. En einn áhugaverðasti hluti hennar er að konur eru öflugri þegar kemur að umhverfisáhrifum, sagði Bjørn Panyella Pedersen, prófessor í erfðafræði við Árósaháskóla, í samtali við TV2. Hann sagði niðurstöðuna spennandi, því hún falli vel að væntingum vísindamanna út frá því sem þeir hafa séð hjá öðrum dýrum.
Líkamsburðir karla á borð við hæð og þyngd krefjast meiri orku vegna þess að vöðvamassi þeirra er meiri en hjá konum og af þeim sökum eru þeir háðari góðri næringu.
