Það er að sjálfsögðu óþægilegt að vera vatnslaus í margar klukkustundir en það upplifðu nokkrir Danir nýlega í kjölfar árásar rússneskra tölvuþrjóta.
Undir vatnsveitur falla þau fyrirtæki sem sjá landsmönnum fyrir drykkjarvatni og vatni til annarra nota og sjá um skólp. Þetta eru auðvitað mjög mikilvægir innviðir sem bæði heimili og fyrirtæki mega illa við að séu óstarfhæf.
Í hættumatinu kemur fram að í desember síðastliðnum hafi rússneskir tölvuþrjótar gert árás á litla vatnsveitu. Þeir juku þrýstinginn í leiðslunum svo mikið að þær gáfu sig á þremur stöðum.
Notendurnir voru vatnslausir í nokkrar klukkustundir og kostnaðurinn við viðgerðir var sem nemur um 4 milljónum íslenskra króna.
