Hvað segirðu um „Grænan mánuð“? Eða eins og rithöfundurinn Anette Sams kallar þetta: „Mánuður með ósveigjanlega stöðugum blóðsykri og þarmaflóru“. En óháð því hvaða nafni þessi mánuður gengur undir, þá snýst hann um að virkja „náttúruleg þyngdartapshormón“ líkamans.
Sams, sem skrifaði bókina „Kroppen kan selv“ segir að allir ættu að prófa aðferðina sem hún telur virka vel. Með því geti líkaminn sjálfur haft stjórn á mörgum hlutum. „Það gengur fólk um sem hefur misst 40-60 kíló með þessari aðferð,“ sagði hún.
„Ég get ekki lofað að þetta gagnist öllum en það getur Wegovy heldur ekki. Ég held að þetta geti hjálpað 95% fólks við að komast í heilbrigða þyngd, betra ónæmiskerfi og miklu heilbrigðari líkama,“ sagði hún. Hún er menntaður lyfjafræðingur og starfaði lengi við rannsóknir hjá danska lyfjarisanum Novo Nordisk.
Í bókinni útskýrir hún hvernig líkaminn myndar þau hormón, sem þyngdartapslyfið Wegovy hermir eftir, ef við gefum honum tækifæri til þess.
Þetta snýst um að virkja þarmahormónið GLP1.
„Við vitum ekki enn fullkomlega hvernig þetta hormón virkar en við vitum meira en áður og það er rugl að þessi vitneskja sé ekki á allra vörum,“ sagði hún.
Lykilatriðið í þessu er að borða mat sem kemst langt niður í smáþarminn áður en hann er meltur. „Þarmarnir eru átta metrar á lengd og samanstanda af flötum frumum sem mynda skil á milli þarmainnihaldsins og annarra hluta líkamans. Sumar af frumunum geta losað um GLP1 ef maður örvar móttakarana á þeim. Leyndardómurinn er að borða mat sem kemst alla leið niður, þar sem hann getur kveikt á stóru líffræðilegu heilsutenglunum áður en hann er tekinn upp í líkamann,“ sagði Sams.
Þeim mun lengra niður í þarmana, sem maturinn kemst, þeim mun fleiri frumur geta myndað GLP1.
Vandinn sem við glímum mörg við, er að við borðum sífellt meira af ofurunnum matvælum. Það er matur sem líkaminn leysir hratt upp og kemst því aldrei niður í þarmana þar sem GLP1 frumurnar geta virkjast.
Grænmeti er mjög gott til að virkja GLP1 og því mælir Sams með mikilli grænmetisneyslu.
