Sky News skýrir frá þessu og segir að þegar hún hafi sent inn umsókn um endurnýjun ökuréttinda sinna hafi tölvukerfi Maryland Motor Vehicle Adminstration umsvifalaust birt skilaboð um að hún væri látin og því ekki hægt að endurnýja ökuréttindi hennar.
„Það virtist sem ég væri látin. Ég varð svolítið hrædd, ég vil ekki ljúga um það, og hissa, af því að ég er á lífi. Hér er ég,“ sagði hún í samtali við NBC4 Washington.
„Andlát“ hennar hafði meiri og alvarlegri áhrif en að hún gat ekki endurnýjað ökuréttindi sín því heilbrigðistrygging hennar var felld úr gildi og því þurfti hún sjálf að greiða fyrir lækniskostnað og hafði ekki efni á að kaupa sér astmalyf sem hún notar öllu jöfnu.
„Þetta hefur algjörlega rústað lífi mínu. Þetta hefur haft mikil áhrif á mig. Þetta hefur haft áhrif á heilsu mína, andlega heilsu,“ sagði hún.
Þegar málið fór að rúlla, var hringt í hana frá almannatryggingum og henni sagt, eins og hún vissi vel, að um mistök hefði verið að ræða. Þau urðu þegar starfsmaður útfararstofu var að skrá upplýsingar um andlát annarrar manneskju. Hann sló einn tölustaf í almannatrygginganúmer viðkomandi rangt inn og þar með var Nicole látin (að minnsta kosti í opinberum skrám).
Nicole hefur nú borist bréf frá almannatryggingum sem staðfestir að mistök hafi verið gerð og að hún sé á lífi.
