Margir ferðamenn leggja leið sína til taílensku ferðamannaparadísarinnar Phuket árlega. En þessa dagana er eyjan vinsæla ekki beinlínis heillandi hvað varðar óþef.

Þar er nú sívaxandi ruslavandi. Reuters segir að mikið sé af plastflöskum og bjórdósum á hafsbotninum við eyjuna og um leið safnast sífellt meira sorp upp á eyjunni sjálfri sem hefur fram að þessu verið þekktust fyrir glæsilegar sandstrendur.

Á hverjum degi flytja flutningabílar og dráttarvélar sorp til risastórs ruslahaugs á eyjunni. Bætast 1.000 tonn við daglega.

Ruslahaugurinn er orðinn svo stór að íbúar í bænum Vassana Toyous hafa misst fjallasýn sína og þurfa þess í stað að sætta sig við ruslafjall.

Aðalástæðan fyrir öllu þessu sorpi er hinn mikli straumur ferðamanna til eyjunnar. Af þeim 35,5 milljónum ferðamanna, sem heimsóttu Taíland á síðasta ári, lögðu 13 milljónir leið sína til Phuket.