Vetrarböð ganga út á að láta líkamann síga niður í ískalt vatn til að ná fram heilsufarslegum ávinningi eins og að draga úr vöðvaverkjum, bólgum og stressi.
En hverjir eru kostirnir og áhættan, við vetrarböð?
Raj Dasgupta, læknir, segir að þegar líkaminn lendir í kulda, þá geti það dregið úr bólgum og hjálpað til við endurnýjun í líkamanum.
Þegar líkaminn lendir í kulda, dragast æðarnar saman sem veldur því að það dregur úr blóðflæði til líkamshlutanna sem eru í kuldanum.
Þegar maður kemur upp úr kalda vatninu, eykst blóðstreymið á nýjan leik til þessara svæða og það hjálpar til við lækningu og bata. Þess utan geta vetrarböð aukið framleiðsluna á hvítum blóðkornum sem eru mikilvæg fyrir ónæmiskerfið.
Vetraböð geta einnig aukið blóðstreymið. Þegar líkaminn lendir í kulda, þá fer hann í „að lifa af gír“ og eykur blóðstreymið til að viðhalda hitanum. Þetta getur hjálpað til við að koma súrefni og næringarefnum til þeirra svæða sem hafa þörf fyrir lækningu og bata. Annar kostur er bætt skap. Rannsóknir hafa sýnt að vetrarböð geta losað um taugaboðefni á borð við dópamín en það hjálpar til við að hafa stjórn á tilfinningum og stressi. Þetta getur valdið jákvæðri líðan eftir að hafa dýft sér í kalt vatnið og hjálpað til við að draga úr kvíða og þunglyndi.
En það fylgir því einnig áhætta að stunda vetrarböð. Ef maður fer of hratt ofan í vatnið, þá getur það valdið sjokkviðbrögðum sem geta leitt til oföndunar og í versta falli drukknunar. Einnig er hætta við ofkólnun því líkaminn missir hita hratt í vatni.
Vetrarböð geta að sögn Dasgupta verið góð fyrir heilbrigt fólk en fólk sem glímir við hjartavandamál og eldra fólk ætti að hans sögn að ráðfæra sig við lækni áður en það prófar vetrarböð.
