Leikarinn og leikstjórinn Mel Gibson er meðal þeirra stórstjarna sem misst hafa heimili sín í skógareldunum miklu í Los Angeles sem hafa nú herjað á íbúa borgarinnar í rúma viku, með gríðarlegu tjóni og á þriðja tug mannsláta. Hefur hann hins vegar fremur notið gagnrýni en samúðar ekki síst vegna samsæriskenningar sem hann hefur varpað fram um orsakir eldanna og þykir frekar vafasöm. Viðurkennir hann meira að segja sjálfur að kenningin sé eilítið „klikkuð“.
Síðastliðið föstudagskvöld var Gibson í viðtali í þættinum Ingraham Angle á sjónvarpsstöðinni Fox News. Tjáði hann þáttastjórnandanum Laura Ingraham að mörgum spurningum væri ósvarað varðandi upphaf eldanna og margt væri hentugt við þá fyrir tiltekna aðila. Velti Gibson því næst upp hvort að fólk hefði verið fengið til að kveikja eldana til að losna við leigjendur af verðmætum lóðum og úr verðmætum fasteignum.
Gibson er mjög trúaður og hallast til hægri í stjórnmálum en hægrisinnaðir álitsgjafar hafa undanfarna daga gefið ýmis konar samsæriskenningum um að eitthvað grunsamlegt sé á bak við eldana í auknum mæli undir fótinn.
Ný gögn benda hins vegar til þess að illar hvatir hafi ekki búið að baki því að sá stærsti af eldunum kviknaði.
Ný gögn varpa óvæntu ljósi á upphaf stærsta eldsins í Los Angeles
Gibson vísaði einnig til þess að ýmis konar vandræði hefðu verið með vatnsmál í Kaliforníu og sömuleiðis með að útvega vatn til að berjast við eldana og þegar svona nokkuð gerðist væri ekki annnað hægt en að velta því fyrir sér hvort það væri með vilja gert.
Gibson virtist þó lítið hafa fyrir sér í þessum vangaveltum sínum og viðurkenndi fyrir Ingraham að þær væru í bilaðri kantinum. Hann sagðist enn fremur geta búið ýmsar skrýtnar kenningar til í hausnum á sér en það hafi verið einum of hentugt að erfiðlega hafi gengið að útvega vatn:
„Það er brjálæðislegt að hugsa svona en maður byrjar að velta því fyrir sér hvort þarna sé viljaverk á bak við. Hvað gæti það verið? Vilja þeir tæma ríkið? Ég veit það ekki.“
Mikil gagnrýni hefur dunið á stjórnvöldum í Kaliforníuríki og borgaryfirvöldum í Los Angeles þar sem Demókratar ráða ríkjum. Hefur gagnrýnin verið mjög hörð frá stjórnmálamönnum úr Repúblikanaflokknum og álitsgjöfum sem hallast að þeim flokki og halda í heiðri hægri sinnuð sjónarmið.
Laura Ingraham er eins og flestir umsjónarmenn á Fox News frekar hægri sinnuð og í viðtalinu við Gibson gaf hún sjálf samsæriskenningum, sem ekkert hefur komið fram um að eigi við rök að styðjast, undir fótinn. Sagði hún að heyrst hefði að eldarnir hefðu verið kveiktir viljandi til að hægt væri að fækka einbýlishúsum og þétta byggðina í staðinn.
Gibson tók undir þessar kenningar þáttastjórnandans en hvorugt þeirra gat framvísað neinum gögnum til að renna frekari stoðum undir orð sín.
Hefur Gibson hlotið töluverða gagnrýni meðal annars á samfélagsmiðlum fyrir orð sín. Einn notandi sagði samsæriskenningarnar tilraun leikara sem búinn væri að vera til að halda fræðgarsól sinni á lofti.
