Það hefur örugglega ekki farið framhjá neinum að Vladímír Pútín, Rússlandsforseti, fór í gegnum vægast sagt blóðugt ár á síðasta ári og hefur óhugnanlegan fjölda mannslífa á samviskunni. En það hefur hins vegar væntanlega farið framhjá flestum hversu góðum árangri forsetinn náði í íþróttum.

Frammistaða hans í íþróttum var frábær á síðasta ári, að minnsta kosti ef maður spyr Mikhail Degtyarev, íþróttamálaráðherra og forseta ólympíunefndarinnar.

„Vladímír Pútín er íþróttamaður ársins í Rússlandi. Hann er aðalþjálfari okkar. Enginn hefur gert jafn mikið og gerði fyrir íþróttir á árinu 2024 og engin mun gera það í framtíðinni,“ sagði hann í samtali við sjónvarpsstöðina Rossiya 24.

Það hefur svo sem lengi verið vitað að Pútín er íþróttaáhugamaður. Hann hefur mikinn áhuga á ísknattleik og spilar sjálfur og það sama gildir um júdó en hann hefur unnið til margra verðlauna í júdó.

Það má segja að svört ský hangi yfir íþróttamanni ársins. Meðal annars vegna lyfjamisnotkunar rússneskra íþróttamanna í aðdraganda vetrarólympíuleikanna 2014 en þar stóð ríkisvaldið á bak við skipulagða lyfjamisnotkun íþróttamannanna.

Þetta auk hliðaráhrifa innrásarinnar í Úkraínu hefur gert samkeppnina um titilinn sem íþróttamaður ársins mjög litla því rússneskum íþróttamönnum er að mestu meinað að keppa á alþjóðlegum mótum.