Stjórnmálamaðurinn og fyrrum þingmaðurinn Adam Daniel Kinzinger tilheyrir flokki repúblikana í Bandaríkjunum. Hann er þó ekki hrifinn af forsetaframbjóðanda flokksins, Donald Trump. Hann er í raun svo andvígur því að Trump verði forseti að hann hefur svikið lit og lýst opinberlega yfir stuðningi við frambjóðanda demókrata, Kamala Harris.

Hann tilkynnti stuðning sinn í ræðu fyrir skömmu þar sem hann viðurkenndi að staðan væri nokkuð neyðarleg, að hann finni sig knúinn til að styðja við frambjóðanda frá öðrum flokki en sínum eigin. Þetta væri þó nauðsyn til að „verja sannleikann, verkja lýðræðið og verja siðgæði“.

Kinzinger segir að Trump hafi kæft sál repúblikanaflokksins og það sé þyngra en tárum taki að sjá þennan flokk, sem hann var áður stoltur af að tilheyra, leggjast svona lágt.

„Donald Trump er aumur maður sem þykist vera sterkur. Hann er lítilmenni sem þykist stór. Hann er trúleysingi sem þykist vera trúfastur. Hann er gerandi sem getur ekki hætt að leika fórnarlamb.“

Kinzinger hefur nú gengið lengra og segir að það sé bókstaflega fnykur af forsetaframbjóðandanum. Í samtali við spjallþáttastjórnandann Jimmy Kimmer lýsti hann lyktinni sem fylgir Trump.

„Ef þú blandar saman handakrikum, tómatsósu, farða og smá rassgati, þá ertu nærri lagi, með þetta allt saman,“ sagði Kinzinger sem lýsti lyktinni sem ágengri og sagði „þú vilt klárlega ekki setja þessa lykt í flöskur og nota Trump rakspíra.“

Kinzinger segir að allir sem umgangast Trump finni lyktina en enginn þori að segja neitt. Sjálfur hafi hann fundið lyktina oftar en einu sinni.

„Hann bauð okkur öllum á forsetaskrifstofuna á sínum tíma og það var erfitt að taka ekki eftir lyktinni“

Kinzinger hefur reyndar áður vakið athygli á óþefnum en hann velti því fyrir sér á Twitter í fyrra hvers vegna enginn segi neitt um þetta. Þetta sé áberandi lykt og ráðlagði hann fólki að nota grímu í kringum Trump.