Í síðustu viku fjarlægðu sérfræðingar um 40.000 býflugur úr húsi einu í Maine í Bandaríkjunum. Um sveitabýli er að ræða sem heitir Smiling Hill Farm og er það í Westbrook. Sama ættin hefur búið á jörðinni síðan 1720. Segja núverandi bændur á jörðinni að býflugur hafi haldið til í húsinu síðustu 80 árin eða svo en nú fannst þeim kominn tími til að láta fjarlægja þær.

Fyrirtækið Bee Huggah var fengið til að fjarlægja býflugurnar sem voru með bú á milli þilja í vegg í húsinu og höfðu líklega verið þar síðustu 80 árin að sögn húsráðanda. WMTW skýrir frá þessu.

Fjölskyldan vildi ekki láta drepa býflugurnar og því var Bee Huggah fengið til verksins. Þeim var komið fyrir í nýjum búum utan við húsið og eru þær nú að venjast nýjum heimkynnum að sögn talsmanns fyrirtækisins.

Fjölskyldan hyggst hafa býflugurnar í nýju búunum um hríð en síðan verða þær fluttar á nýjan stað á landareigninni.