Forsetaframbjóðandinn Donald Trump og varaforsetaefni hans, JD Vance, eru sannfærðir um að hópur innflytjenda í Springfield, Ohio, stundi það að borða gæludýr nágranna sinna. Þessu halda frambjóðendurnir fram án þess að nokkur fótur hafi fundist fyrir þeim ásökunum. Þvert á móti hafa fjölmiðlar sýnt fram á að sögusagnirnar eigi líkast til rætur að rekja til samtaka nýnasista sem vildu kynda undir hatri gegn útlendingum.
Nú hafa hagsmunasamtök innflytjenda frá Haíti í Springfield boðað kærur á hendur frambjóðendunum, en þeir hafi með framgöngu sinni stuðlað að óeirðum og ítrekuðum ofbeldishótunum gegn innflytjendum.
Um er að ræða svokallaða borgaralegakæru sem eru sjaldheyrðar í Bandaríkjunum. Samtökin saka frambjóðendurna um að hafa raskað almannafrið, dreift fölskum viðvörunum, áreitni í gegnum fjarskiptabúnað, ógnanir og fleira. Samtökin hafa óskað þess að dómstólar taki málið fyrir.
„Þeir láta sér ekki segjast heldur sitja fastir við sinn keip, jafnvel þó að ríkisstjórinn og borgarstjórinn hafi báðir sagt að þessar sögusagnir séu falskar. Slík framkoma sýnir fram á ásetning,“ segir talsmaður samtakanna og bæti við að frambjóðendurnir dreifi þessum sögum gegn betri vitund og séu þar með viljandi að fremja glæp.
Talsmaður framboðs Trump og Vance, Steven Cheung, segir að fullyrðingar frambjóðendanna þurfi að skoða í réttu samhengi. Þeir séu að benda á að núverandi stefna Bandaríkjanna í innflytjendamálum sé meingölluð og að ólöglegir innflytjendur hafi tekið yfir samfélög á borð við Springfield og fleiri.
Rétt er að geta þess að innflytjendur Springfield frá Haíti komu til Bandaríkjanna með löglegum hætti eftir að þeir fengu þar tímabundið hæli. Síðustu vikur hafa rúmlega 30 sprengjuhótanir borist gegn opinberum stofnunum og skólum í Springfield sem hafa valdið miklu raski á starfsemi. Sumir innflytjendur segjast óttast um líf sitt á almannafæri og borgarstjórinn hefur fengið líflátshótanir.
„Ef einhver annar en Trump og Vance hefði gert það sem þeir hafa nú gert, að valda sundrung og óeirðum í Springfield sem leiddi til sprengjuhótana, leiddi til þess að rýma hefur þurft opinberar stofnanir og skóla, að borgarstjóra og fjölskyldu hans hafa borist líflátshótanir – þá hefðu þeir aðilar þegar verið handteknir. Þessir menn eru ekki yfir lögin hafnir.“
