Þann 6. september voru feðgar saman á veiðum í Wisconsin í Bandaríkjunum. Faðirinn, hinn 43 ára Ryan Beierman, skaut þá úr skammbyssu á svartbjörn og særði hann. Björninn brást við þessu með því að ráðast á hann og áður en Beierman vissi af, lá hann undir birninum.

„Það eina sem ég sá voru klær og tennur. Ég lyfti hægri handleggnum til að reyna að loka fyrir árás hans. Ég man eftir fyrsta bitinu. Ég heyrði marr, björninn var enn að ráðast á mig. Hann vildi ekki fara frá mér,“ hefur AP eftir Beierman.

En það varð honum líklega til lífs að 12 ára sonur hans, Owen, náði veiðiriffli föður síns og skaut og drap björninn sem lá ofan á Beierman.

Beierman náði síðan að ýta birninum ofan af sér. Hann sagðist telja að árásin hafi staðið yfir í um 45 sekúndur.

Gert var að sárum hans á sjúkrahúsi en hann var með fjölda bitsára og skurð á hægri handleggnum. Auk þess hafði björninn gert gat í aðra kinn hans og sauma þurfti 23 spor í bringuna.