Ástralska lögreglan skýrði frá þessu um helgina. Hún segist ætla að fara fram á framsal mannsins til Ástralíu. Hann er bæði með ástralskan og grískan ríkisborgararétt.
Hann er grunaður um að hafa stungið Suzanne Armstrong, 27 ára, og Susan Bartlett, 28 ára, til bana.
Shane Patton, lögreglustjóri í Victoria ríki, sagði að á þeim 47 árum sem eru liðin síðan morðin voru framin, hafi lögreglan aldrei gefið upp vonina um að geta upplýst þau.
Lík kvennanna fundust á heimili þeirra við Easey Street í Melbourne þann 13. janúar 1977. Báðar höfðu verið stungnar margoft.
Suzanne átti 16 mánaða son sem var til staðar í íbúðinni en hann lá ómeiddur í rimlarúmi sínu þegar að var komið.
Patton sagði að morðin hafi haft mikil áhrif á samfélagið, tvær konur hafi verið myrtar á staðnum þar sem þær töldu sig öruggastar.
The Age segir að DNA-rannsókn hafi komið lögreglunni á spor ættingja hins handtekna og eitt hafi leitt af öðru þar til hann var handtekinn í síðustu viku. Maðurinn hefur búið í Grikklandi um árabil.
