Fagurbláir safírar líta svolítið út eins og molar úr skýjum sem hafa fallið til jarðarinnar. En þeir koma auðvitað ekki úr skýjunum. Þeir koma frá svæðinu á milli jarðskorpunnar og kviku sem kemur úr möttlinum. Þetta eru miðjulög jarðarinnar.

Live Science hefur eftir Axel Schmitt, jarðfræðingi við Curtin University í Ástralíu og aðalhöfundi nýrrar rannsóknar, að fram að þessu hafi verið talið að safírar myndist í sjálfum möttlinum eða neðri lögum jarðskorpunnar.

En nýja rannsóknin sýnir að safírar myndast ofar í jarðskorpunni, í hjarta eldfjalla, kvikuhólfum á um 5 km dýpi.