Rifrildi í dómshúsi í Kentucky í gær enduðu með því að dómari við umræddan dómstól var skotinn til bana og lögreglustjórinn á svæðinu handtekinn grunaður um morð.

Svo virðist sem til orðaskaks hafi komið á milli Mickey Stines, lögreglustjóra í Letcher-sýslu, og dómarans Kevin Mullins á skrifstofu þess síðarnefnda með þeim afleiðingum að Stines dró upp byssu sína og skaut Kevin nokkrum sinnum. Hann var úrskurðaður látinn skömmu síðar.

Lögregla hefur ekki veitt miklar upplýsingar um málið en tekið er fram að Stines hafi verið handtekinn í dómshúsinu og ekki sýnt neina mótspyrnu.