Morðinginn John Bittrolff, sem var sakfelldur árið 2017 fyrir að hafa myrt tvær konur fyrir rúmum tuttugu árum síðan, hefur óskað eftir endurupptöku í máli sínu eftir að meinti raðmorðinginn Rex Heuermann var ákærður fyrir morðið Sandra Costilla.
Bittrolff var dæmdur í lífstíðarfangelsi árið 2017 fyrir að hafa myrt Rita Tangredi og Colleen McNamee. Tangredi var 31 árs vændiskona og lík hennar fannst árið 1993. Hún hafði verið kyrkt og barin til dauða og lík hennar hafði verið stillt upp með sérstökum hætti. McNeem var tvítug vændiskona og lík hennar fannst þremur mánuðum síðar. Hún var nakin og hafði verið stillt upp með sérstökum hætti og banamein hennar voru kyrking og barsmíðar. Rannsókn beggja morða gekk hægt en það var ekki fyrr en mörgum árum síðar eftir að bróðir Bittrolff var handtekinn í ótengdu máli. Lögregla komst þannig yfir erfðaefni frá bróður Bittrolff sem reyndist sýna skyldleika við erfðaefni sem fannst á Tangredi og McNamee. Síðar komst lögregla yfir erfðaefni Bittrolff með því að róta í ruslatunnunni hans. Erfðaefnið reyndist passa alfarið við það sem fannst á líkunum.
Lík Söndru Costilla fannst á svipuðum tíma og á svipuðum slóðum. Hún fannst í nóvember árið 1993. Henni hafði verið stillt upp með svipuðum hætti og Tangredi og McNamee. Hún hafði verið kyrkt og orðið fyrir hrottalegum barsmíðum.
Morðin þrjú þóttu það svipuð að líklegast væri að konurnar hefðu verið myrtar af sama aðila. Þær voru allar jaðarsettar konur, smávaxnar og líkum þeirra var komið fyrir í skóglendi eftir að það voru kyrktar. Þær höfðu eins allar orðið fyrir frekari barsmíðum. Eins fannst sag hjá líkunum þremur sem benti til tengsla. Bittrolff var formlega nefndur sakborningur í morði Costilla en lögreglu tókst þó ekki að finna sambærileg sönnunargögn, erfðaefni, til að formlega ákæra hann.
Bittrolff hefur alltaf neitað sök og nú krefst hann þess að til skoðunar verði tekið hvort Heuermann hafi eins banað Tangredi og McNamee. Hann gengst aðeins við því að hafa reglulega haft samfarir við vændiskonur sem hann segir útskýra hvernig erfðaefni hans fannst á líkunum.
Verjandi Bittrolff segir að það sé galið fyrir lögreglu að íhuga ekki þann möguleika að Bittrolff sé saklaus: „Allar þrjár – Sandra, Rita og Colleen – voru myrtar á sama tímabili… allar fundust í skóglendi, fætur þeirra voru sundurglentir, hendurnar yfir höfðum þeirra, og á þær allar vantaði einn skó. Pilsið hafði verið togað yfir andlitið á bæði Colleen og Söndru og saksóknari segir að það hafi fundist viðarsag á öllum þremur líkunum. Það sér hver heilvita maður að sami aðilinn bæri ábyrgð á öllum þessum morðum.“
