Leiðtogi Hezbollah-samtakanna, Hasan Nasrallah, segir árásir Ísrael á Hezbollah í vikunni hafi falið í sér stríðsyfirlýsingu.
„Óvinurinn hefur gengið yfir öll mörk og farið yfir strikið,“ sagði Nasrallah í ávarpi sínu sem margir höfðu beðið eftir í kjölfar sprengjuárása á vikunni. Minnst 37 létu lífið og hátt í 3.000 særðust þegar símboðar í eigu Hezbollah sprungu samtímis á þriðjudaginn og svo þegar talsstöðvar samtakanna sprungu degi síðar.
Nasrallah segir að árásirnar feli í sér stórfellda ögrun við Líbanon, öryggi þjóðarinnar og fullveldi. Telur hann jafnframt að með árásunum hafi Ísrael framið stríðsglæpi og lýst beinlínis yfir stríði.
Á meðan ávarpi Nasrallah var sjónvarpað flugu herþotur Ísrael yfir landið og sprengjudrunur heyrðust í höfuðborginni. Nasrallah sagði Hezbollah þó ekki af baki dottin, en samtökin muni halda aðgerðum sínum gegn Ísrael áfram svo lengi sem Ísrael heldur áfram stríði sínu á Gaza-ströndinni í Palestínu.
„Ísrael mun mæta uppgjöri og við munum gjalda þeim árásirnar hvort sem þeim líkar það eða ekki.“
Ísrael hefur ekki gengist við ábyrgð á árásunum en sérfræðingar telja þó erfitt fyrir yfirvöld þar í landi að þræta fyrir árásirnar þar sem svo margt bendir til að öryggissveitir Ísrael hafi þróað og dreift sprengjunum. Bandaríkin hafa þó lýst því yfir að Ísrael sé á bak við árásirnar.
Íbúar í höfuðborg Líbanon, Beirut, eru nú uggandi og óttast að árásirnar verði fleiri.
