Til að koma í veg fyrir hryðjuverk íslamskra öfgamanna hefur þýska ríkisstjórnin ákveðið að taka upp landamæraeftirlit við öll landamæri landsins en það á landamæri að níu öðrum ríkjum.

Landamæraeftirlitið hefst 16. september og mun standa í sex mánuði til að byrja með. Auk hryðjuverkaógnar, er það vaxandi flóttamannastraumur sem fær Þjóðverja til að grípa til þessara aðgerða.

Þjóðverjar eru aðilar að Schengen-samningnum sem tryggir frjálsa för innan Schengensvæðisins. En samningurinn veitir aðildarríkjunum einnig möguleika á að taka upp landamæraeftirlit, ef ekkert annað er til ráða, til að glíma við ógnir gegn þjóðaröryggi og almannareglu.