Einn heppinn miðahafi var með allar tölurnar réttar í bandaríska Mega Millions-lottóinu í gær. Ekki var um neinn smávinning að ræða því 20 útdrættir voru frá því að síðasti risapottur gekk út. Var potturinn að þessu sinni rúmlega 800 milljónir Bandaríkjadala, eða 111 milljarðar íslenskra króna.

Lukkutölurnar að þessu sinni voru 1, 2, 16, 24, 66 og var ofurtalan 6.

Miðinn var keyptur á bensínstöð í Sugar Land í Texas og fær bensínstöðin í sinn hlut eina milljón dollara, tæpar 140 milljónir króna. Sigurvegarinn hefur ekki gefið sig fram og því ekki ljóst á þessari stundu hver það var sem datt í lukkupottinn.

Í frétt New York Post kemur fram að líkurnar á að vinna þann stóra í Mega Millions-lottóinu séu eiginlega stjarnfræðilega litlar, eða 1 á móti 302.575.350.