Það er auðvitað almenn vitneskja að öruggt kynlíf er frábært kynlíf og ef maður vill vörn gegn kynsjúkdómum og þungun, þá er smokkurinn tilvalinn. En ef þú, eða bólfélaginn, hafið mikið úthald í rúminu þá er rétt að hafa í huga að það má ekki nota sama smokkinn of lengi í sömu samförunum.

Ef samfarirnar sjálfar, það er að segja limur er inni í leggöngum eða endaþarmi, standa lengur en í 30 mínútur þarf að skipta um smokk. Metro skýrir frá þessu og hefur þetta eftir Bhavini Shah, lækni. Hann sagði að núningur veiki smokkinn og auki líkurnar á að hann rifni. Ef samfarirnar vari skemur en 30 mínútur, þá sé allt í fínu lagi en ef þær taka lengri tíma sé betra að setja nýjan smokk á. En hann benti einnig á að það skipti auðvitað máli hversu kraftmiklar samfarirnar séu.

Eflaust dettur sumum í hug að þetta sé nú hægt að leysa með því að setja tvo smokka á í upphafi og þannig sé hægt að sleppa við að þurfa að gera hlé á samförunum. En það gengur ekki að sögn Shah. Hann sagði að það að nota tvo smokka í einu sé hættulegra en að nota einn því smokkarnir nuddist saman og núningurinn geti hugsanlega gert gat á þá. „Þetta á einnig við um að nota karl- og konusmokk samtímis,“ sagði hann.