Lögreglan í þýska bænum Moers skaut í gær 26 ára karlmann til bana. Maðurinn var vopnaður hníf og að sögn hafði hann ráðist á vegfarendur og haft í hótunum við aðra. Þetta átti sér stað í íbúðarhverfi í bænum.

Bild skýrir frá þessu og segir að þegar lögreglumenn komu að manninum hafi hann ráðist að þeim með tvo hnífa á lofti.

Drógu lögreglumennirnir þá upp skammbyssur sínar og skutu manninn til bana.

Hann var þýskur.

Ekki eru margir dagar síðan þrír voru drepnir og átta særðir á bæjarhátíð í Solingen. 26 ára Sýrlendingur er í haldi lögreglunnar, grunaður um ódæðisverkið.