Það er óhætt að segja að Jesse Kipf, 39 ára Bandaríkjamaður, hafi lagt mikið á sig til að reyna að komast hjá því að borga meðlag með dóttur sinni. Hann braust inn í tölvukerfi Hawaii Death Registry til að skrá sig látinn.

Þetta segja saksóknarar í Kentucky. Þeir segja að Kipf hafi fyllt út eyðublað um að hann væri látinn og skrifað undir með rafrænni undirskrift læknis í öðru ríki. Andlát hans var þá sjálfkrafa skráð í fjölda opinberra tölvukerfa.

Metro segir að Kipf hafi ætlað að komast hjá því að greiða fyrrum eiginkonu sinni rúmlega 100.000 dollara í meðlag með dóttur þeirra.

Að sögn saksóknara játaði hann að hafa brotist inn í tölvukerfið og skráð eigið andlát. En hann lét ekki þar við sitja því hann braut einnig inn í svipuðu skráningarkerfi annarra ríkja og yfirvalda, fyrirtækja og netkerfi einkafyrirtækja og stal persónuupplýsingum sem hann reyndi síðan að selja á djúpnetinu.

Kipf játaði þetta allt saman fyrir dómi og var dæmdur í 81 mánaða fangelsi.