Þrátt fyrir að vín, þá er átt við rauðvín, innihaldi alkóhól, þá hafa vísindarannsóknir árum saman sýnt fram á að það geti haft jákvæð áhrif á heilsuna að drekka það, auðvitað í hófi en ekki óhófi. Í upphafi aldarinnar var töluvert fjallað um að víndrykkja væri góð fyrir hjartað.
En er þetta rétt og hvað þarf maður að hafa í huga þegar maður opna vínflösku? Tveir næringarfræðingar voru fengnir til að skoða þetta fyrir tímaritið Elle og niðurstaðan kemur kannski sumum á óvart.
Það leikur enginn vafi á að vín inniheldur efni sem geta verið góð fyrir líkamann. Pólýfenól, sem er í víni, og resveratrol, sem er í húð rauðra vínberja, geta minnkað magn LDL-kólesteróls og dregið úr líkunum á blóðtöppum.
Andoxunarefni vinna einnig gegn bólgum og geta verndað hjarta- og æðakerfið.
En hér enda góðu fréttirnar fyrir þá sem elska vín og vilja gjarnan fá sér glas öðru hverju því það er stórt EF!
Michelle Routhenstein, næringarfræðingur, sagði að vín sé ekki endilega besta uppsprettan til að ná sér í þessi efni. Magn andoxunarefna í víni getur verið mjög breytilegt og það getur dregið úr virkni þeirra ef þeirra er neytt í gegnum alkóhól.
Kailey Proctor, næringarfræðingur, sagði að engin vísindaleg gögn séu til sem sýni bein tengsl á milli alkóhólneyslu og heilbrigðara hjarta. Hún sagði einnig að áfengi, þar á meðal léttvín, hafi aukaverkanir, til dæmis geti neyslan aukið líkurnar á að fá krabbamein.
Lykilorðið þegar kemur að víni er hóf, að drekka það í hófi.