Nýlega var Abernethy perlan seld fyrir sem svarar til 17 milljóna íslenskra króna á uppboði í Edinborg í Skotlandi. Það gleður eflaust margt skoskt hjartað að kaupandinn er skoskur, svo perlan mun ekki yfirgefa Skotland.

Perlan fannst 1967 í kræklingi og er talið að þar hafi hún vaxið og dafnað í rúmlega 80 ár áður en hún fannst.

Sky News segir að perlan sé stærsta skoska ferskvatnsperlan sem fundist hefur, að minnsta kosti í manna minnum. Nafn hennar er dregið af manninum sem fann hana, William Abernethy, sem var síðasti skoski perluveiðimaðurinn. Hann lést 2021, 96 ára að aldri. Hann ljóstraði því aldrei upp hvar hann fann perluna. Perluveiðar hafa verið bannaðar í Skotlandi frá 1996. Talið er að perlu sé að finna í 1 af hverjum 5.000 kræklingum sem eru í skoskum ám.

Perlan seldist fyrir 93.951 pund á uppboði hjá Lyon & Turnbull í Edinborg á miðvikudag í síðustu viku. Uppboðshaldarinn segir að þetta sé hæsta verð sem fengist hefur fyrir þessa tegund perlu.