Þessu er haldið fram í nýrri bók, A Voyage Around the Queen, eftir blaðamanninn, rithöfundinn og skopmyndateiknarann Craig Brown. Brown þessi hefur um langt skeið teiknað skopmyndir og skrifað satírur um bresk stjórnmál fyrir blöð eins og The Times og The Daily Mail og þá hefur hann sent frá sér fjölda bóka sem fengið hafa góðar viðtökur.
Í nýjustu bók sinni varpar hann ljósi á líf og störf Elísabetar II Bretlandsdrottningar og í kaflabroti sem birtist á vef Daily Mail í vikunni kemur fram að henni hafi ekki líkað sérstaklega vel við Trump.
Elísabet tók tvisvar á móti forsetanum í valdatíð hans og kemur fram í bókinni að henni hafi „sérstaklega mislíkað“ hvernig Trump horfði stöðugt yfir axlirnar á henni í „leit að einhverjum áhugaverðari“ til að ræða við.
Elísabet er einnig sögð hafa klórað sér í kollinum yfir hjónabandi Donalds Trump og Melaniu Trump og sagt að þau hlytu að vera með einhvers konar „samkomulag“. Annars væri hún varla gift honum.
Opinberanirnar í bók Browns eru væntanlega högg í maga Trumps sem sjálfur hefur talað afar fallega um drottninguna. Þau hittust fyrst árið 2018, ekki löngu eftir að Trump tók við embætti, og var hann sagður hafa látið drottninguna bíða eftir sér í 10 mínútur í 27 stiga hita.
Þau hittust svo aftur ári síðar og við það tilefni sagði Trump í viðtali við Fox News: „Við hlógum og skemmtum okkur konunglega. Fólkið hennar sagði að hún hefði ekki skemmt sér svona vel í 25 ár.“