Þetta segja samtökin Buglife en þau hafa miklar áhyggjur af hvað fáir geitungar eru á sveimi þetta sumarið í Bretlandi.
Metro skýrir frá þessu og segir samkvæmt því sem meindýraeyðar segi, þá sé sáralítið um geitunga þetta sumarið.
Orsökin gæti verið loftslagsbreytingarnar en þær hafa áhrif á vistkerfið. Sumir spyrja sig þá eflaust hvort það sé einhver skaði af því að lítt vinsæl tegund á borð við geitunga hverfi af sjónarsviðinu?
Geitungar eru illa þokkaðir af flestum því þeir geta verið hvimleiðir og árásargjarnir og fólk með ofnæmi getur dáið við stungur þeirra.
Metro hefur eftir talsmanni Buglife að ef þér líki ekki við geitunga, þá sé rétt að hafa í huga að þér muni líka enn verr við heim án geitunga. Það myndi í grunninn þýða að meirihluti mannkyns yrði að breyta mataræði sínu algjörlega. Fólk þyrfti þá í miklu meiri mæli að nærast á mat sem ekki þarfnast frjóvgunar, til dæmis korni, hrísgrjónum og kartöflum.
Þetta yrði mjög einhæft mataræði, nánast eins og á miðöldum þegar meirihluti fólks lifði nær eingöngu á graut.
Ástæðan er að geitungar sjá um að frjóvga plöntur, alveg eins og hunangsflugur og fiðrildi. Örlög þessara tegunda eru samtvinnuð og hjá öllum tegundunum fækkar einstaklingunum.