Maðurinn var í göngutúr skammt frá heimili sínu þegar að minnsta kosti níu börn og unglingar byrjuðu að elta hann upp úr þurru og ögra honum. Atvikið náðist á eftirlitsmyndavél og á því má sjá þegar maðurinn reynir að forða sér á hlaupum þegar ungmennin byrja að hrinda honum og slá hann.
Atvikið átti sér stað klukkan sjö að kvöldi við gatnamót Howard Avenue og Clove Road og segir maðurinn augljóst að ungmennin hafi verið að leita að slagsmálum.
Maðurinn hlaut þó nokkra áverka í árásinni; hann var með glóðarauga, blóðugur í andliti og meiddist einnig á hné eftir að honum var hrint í götuna. Hann var fluttur á sjúkrahús þar sem gert var að sárum hans.
Ungmennin forðuðu sér á hlaupum þegar aðrir vegfarendur ætluðu að fara að skipta sér af en þeir höfðu áreitt aðra vegfarendur áður en þeir réðust á manninn.
Vito Fossella, formaður íbúasamtaka í hverfinu, segir glæpi sem þessa óþolandi og þarna hefði hver sem er getað orðið fyrir árás. Tilviljun hafi orðið til þess að þessi tiltekni maður, sem var að njóta sumarblíðunnar í hverfinu sínu, varð fyrir árás.
Maðurinn sagði sögu sína í viðtali við NBC New York þar sem hann kvaðst hræddur við að fara út úr húsi eftir atvikið. „Mig langar bara að flytja héðan, ég vil ekki búa hér lengur,“ segir hann.
Lögregla hefur handtekið tvo úr hópi grunaðra, 13 og 14 ára drengi, og hafa þeir verið ákærðir fyrir líkamsárás.
