Jennifer var í raun fyrir löngu búin að gefa upp alla von um að hún myndi sjá köttinn, sem fékk hið skemmtilega nafn Sam Sam the Kittycat Man, aftur en þá gerðist hið ótrúlega. Hún fékk símtal frá dýraverndunarsamtökunum Charleston Animal Society á dögunum þess efnis að Sam væri hjá þeim.
Þetta hefði ekki gerst nema fyrir þá staðreynd að Jennifer lét örmerkja Sam fyrir margt löngu. Hvað hefur drifið á daga hans undanfarin ellefu ár er óvíst en Sam var horaður og í félagsskap annarra villikatta sem halda til á Charleston-svæðinu. Það sem vakti athygli er að Sam fannst ekki ýkja langt frá heimili Jennifer, eða rúmum kílómetra í burtu.
„Ég hélt að það væri verið að gera grín í mér, því ég taldi ekki möguleika á að hann væri enn þarna úti. En þetta er í sjálfu sér kraftaverk,“ sagði Jennifer við starfsfólk dýraathvarfsins.
Jennifer var ekki lengi að koma í dýraathvarfið þar sem hún sá Sam í búrinu sínu. Það er skemmst frá því að segja að hún felldi nokkur gleðitár þegar hún sá að þetta var hann. Eftir að Sam hafði fengið góða þjónustu dýralækna sem vottuðu að hann væri þokkalega heill heilsu fékk Sam að fara heim með „mömmu“ sinni.
Jennifer segir við AP að Sam hafi horfið dag einn árið 2013 þegar hundur gerði sig líklegan til að elta hann. Hann hljóp út í buskann og virðist ekki hafa ratað heim aftur.
„Ég leitaði og leitaði á sínum tíma og spurði út um allt hvort einhver hefði séð hann,“ segir Jennifer. Hún segir að síðan Sam kom heim hafi hann varið mestum tíma í rúminu, annað hvort einn eða með henni. Hann hafi ekki nokkurn áhuga á að fara út fyrir hússins dyr, eðlilega kannski.
