Vegna aðgerða tengdum heimsfaraldri kórónuveirunnar hefur Norður-Kórea verið nær algjörlega lokað land fyrir ferðamenn síðan 2020. En nú verður breyting á að sögn ferðaþjónustufyrirtækja því til stendur að opna landamærin við borgina Samjiyon og hugsanlega annars staðar fyrir ferðamönnum.

Sky New skýrir frá þessu og segir að til standi að opna landamærin síðar á árinu eftir því sem talsmenn ferðaþjónustufyrirtækja segi.

Frá því að landinu var lokað fyrir ferðamönnum 2020 þá hafa aðeins fámennir hópar rússneskra ferðamanna fengið að heimsækja landið en það gerðist í júní þegar Vladímír Pútín, Rússlandsforseti, var þar í opinberri heimsókn.

Koryo Tours, sem er ferðaþjónustufyrirtæki með höfuðstöðvar í Peking, sagði að þar á bæ hlakki starfsfólkinu til enduropnunar landamæranna. Að sögn fyrirtækisins verður þetta staðfest endanlega á næstu vikum og að fyrstu ferðamennirnir geti heimsótt Samjiyon í desember.

Norður-Kórea hefur verið að byggja „sósíallístíska útópíu“ í Samjiyon sem er við kínversku landamærin. Þar hafa nýjar íbúðir, skíðasvæði, verslanir, menningarstofnanir og heilbrigðisstofnanir verið reistar.

Rússnesku ferðamennirnir sem fengu að fara þangað fyrr á árinu í fjögurra daga ferð voru ekki yfir sig hrifnir af áfangastaðnum og því að „leiðsögumaður“ fylgdi þeim við hvert fótmál.