Ferðamaður einn á Spáni sló nýlega líklega met í viðleitni sinni til að ná góðu plássi á ströndinni. Proyacto Marstral veðurstofan skýrir frá þessu á X og birti mynd af ferðamanninum á ströndinni en hún var tekin með eftirlitsmyndavél.
Á myndinni sést sólhlíf sem er búið að setja upp á ströndinni klukkan hálf sex að morgni en þá er enn myrkur á þessum slóðum. „Nýtt met,“ skrifaði veðurstofan.
Með þessu sló viðkomandi ferðamaður fyrra met sem var sett nokkrum dögum áður en þá sló sólsjúkur ferðamaður sólhlífinni sinni upp klukkan 05.45.
Margir hafa tjáð sig um nýja metið á samfélagsmiðlum: „Við toppum okkur hvað eftir annað,“ skrifaði einn og annar skrifaði: „Þessi manneskja hlýtur að vera fáviti.“
Heitið „handklæðamafían“ er notað yfir ferðamenn sem mæta á sundlaugarbakkann um leið og sundlaugargarðarnir eru opnaðir, eða á ströndina eldsnemma að morgni, og setja handklæðin sín á sólbekkina til að tryggja sér þá. Þeir láta sig síðan hverfa og koma ekki aftur fyrr en mörgum klukkustundum síðar þegar þeir eru búnir að fá sér blund og morgunmat. Á meðan geta aðrir gestir ekki notað sólbekkina.
Spænska lögreglan hefur tekist á við þetta vandamál á ströndum landsins í sumar. Á sumum liggur nú sekt upp á sem nemur allt að 110.000 íslenskum krónum fyrir að skilja handklæði eftir á sólbekkjum eða stólum á ströndum, það er að segja ef eigandi handklæðisins notar bekkinn eða stólinn síðan ekki fyrr en eftir ákveðinn tímapunkt að morgni.
Sum hótel á Mallorca hafa tekið upp á því að fjarlægja handklæði sem eru skilin eftir á sólbekkjum við hótelið fyrir klukkan 8.