Lögreglan í Placer-sýslu í Kaliforníu í Bandaríkjunum hefur handtekið 55 ára karlmann vegna gruns um að hafa framið tvö morð fyrir skemmstu. Maðurinn sem um ræðir heitir Brent Clifford og er hann sonur eins af stofnendum Creedence Clearwater Revival, trommuleikarans Doug Clifford.

Brent, sem er 55 ára, er grunaður um að hafa myrt kærustuna sína, hina 48 ára gömlu Patriciu Portella-Wright. Tilkynnt var um hvarf hennar þann 9. ágúst síðastliðinn eftir að hún skilaði sér ekki til vinnu. Sást síðast til hennar nokkrum dögum áður í Reno í Nevada.

Tveimur dögum síðar, eða þann 11. ágúst, fannst lík 68 ára karlmanns, William F. Andrews, á heimili hans í Reno og hafði hann verið skotinn til bana.

Lögreglu grunaði strax að málin tengdust og hófst í kjölfarið leit að Brent sem talinn var vera á bifreið Andrews. Það reyndist á rökum reist og var hann handtekinn í Plumas-sýslu í Kaliforníu. Það var svo daginn eftir handtökuna að lík Patriciu fannst og hafði hún verið stungin til bana.

Lögreglu grunar að Brent hafi myrt bæði Patricu og Andrews en ekki liggur ljóst fyrir hvernig þau tengdust eða hvaða ástæður liggja að baki morðunum.