Veður var slæmt þegar snekkjan sökk en hún var við akkeri skammt frá Porticello þegar slysið varð. Rannsókn á tildrögunum stendur yfir og leikur jafnvel grunur á því að snekkjan hafi lent í skýstróki.
The Telegraph ræddi við Monicu Jansen sem starfaði lengi á umræddri snekkju og segist hún hafa lent í allskonar óveðrum þegar hún starfaði þar á árunum 2018 til 2020. Hún hafi meðal annars siglt á snekkjunni yfir Atlantshafið og snekkjan staðið öll veður af sér og rúmlega það. Hvernig hún fór að því að sökkva svona skammt frá landi á meðan hún var við akkeri veki spurningar um hvað gerðist.
Alls voru 22 í snekkjunni þegar henni hvolfdi, flestir þeirra breskir ríkisborgarar, og er búið að finna lík kokksins sem var um borð. Sex er sem fyrr segir enn saknað. Auk Mike Lynch er 18 ára dóttur hans saknað sem og Jonathan Bloomer sem er hátt settur stjórnandi hjá Morgan Stanley. Eiginkonu Bloomer er einnig saknað. Þá er lögfræðingnum Chris Morvillo og eiginkonu hans saknað.
Lynch er vellauðugur og komst hann til dæmis eitt sinn á lista Forbes yfir ríkustu menn heims. Hann seldi fyrirtækið Autonomy til Hewlett–Packard árið 2011 og fékk í sinn hlut 800 milljónir Bandaríkjadala en sú sala átti eftir að draga dilk á eftir sér.
Lynch var stefnt fyrir dóm vegna gruns um að hafa fegrað bókhald Autonomy og fór svo að hann var framseldur til Bandaríkjanna í fyrra. Fyrr í sumar var hann hins vegar sýknaður og var hópurinn á snekkjunni til að fagna sýknudómnum.
Daily Mail segir frá því að fyrrverandi kollegi Lynch, Stephen Chamberlain, sem einnig var ákærður í fjársvikamálinu, hafi dáið í bílslysi fyrir örfáum dögum eftir að ekið var á hann. Var Stephan úti að skokka í Cambridgeshire á Englandi síðastliðinn laugardag þegar ekið var á hann. Lögregla telur að um slys hafi verið að ræða og var ökumaðurinn á vettvangi þar til lögregla og sjúkralið komu á staðinn.