11 ára drengur var stunginn til bana á fótboltavelli í spænska bænum Mocejón um klukkan 10 í gærmorgun. Grímuklæddur maður hljóp þá inn á völlinn og stakk drenginn. Að því loknu sýndi hann af sér árásargjarna hegðun og flúðu aðrir þá frá vettvangi.

Marca skýrir frá þessu og segir að mörg börn hafi orðið vitni að þessum hryllingi.

Lögreglan hóf strax mikla leit að morðingjanum sem náði að flýja af vettvangi. Ekki er vitað af hverju maðurinn myrti drenginn.

OK Diario segir að talið sé að morðinginn sé 16-17 ára gamall.

Viðbragðsaðilar komu fljótt á vettvang og sjúkraþyrla lenti skömmu eftir níðingsverkið. En því miður tókst ekki að bjarga lífi drengsins.