Los Angeles er á hættusvæði ef stór skjálfti verður á misgenginu en niðurstaða nýrrar rannsóknar sýnir að áhrif stórs skjálfta á Los Angeles verða hugsanlega ekki eins mikil og vísindamenn hafa óttast fram að þessu.
Niðurstöður nýs hermilíkans á áhrifum skjálfta upp á 7,8 á sunnanverðu San Andreas misgenginu benda til að jörðin muni hreyfast helmingi minna í Los Angeles en áður hefur verið talið.
Live Science segir að þetta geti verið góðar fréttir fyrir Los Angeles og borgarbúa en þeir ættu þó ekki að sofna á verðinum því mörgum spurningum sé enn ósvarað varðandi áhrif stórs skjálfta á svæðinu.
Te-Yang Yeh, meðhöfundur rannsóknarinnar, sagði að þetta sé aðeins ein af hugsanlegum sviðsmyndum.
Rannsóknin byggist á keyrslu sviðsmynda í hermilíkani og var gengið út frá því að upptök skjálftans væru 50 km austan við miðborg Los Angeles.
Samkvæmt áætlunum jarðskjálftamiðstöðvar Kaliforníuríkis þá er versta sviðsmynd slíks skjálfta að 1.800 manns látist, 50.000 slasist og að tjón upp á 200 milljarða dollara verði.
