Live Science segir að niðurstöður nýrrar rannsóknar bendi til að Neanderdalsmenn hafi í raun blandast okkur nútímamönnum og þannig runnið saman við tegundina okkar. Höfundar rannsóknarinnar byggja þetta á því að þeir hafa komist að því að DNA úr nútímamönnum var 2,5% til 3,7% af erfðamengi Neanderdalsmanna.
Fernando Villanea, erfðafræðingur við University of Colorado Boulder, kom ekki að gerð rannsóknarinnar en hann telur að hún varpi ljósi á að það sem við höfum talið vera sérstaka ætt Neanderdalsmanna hafi í raun verið meira tengd forfeðrum okkar. „Bæði nútímamenn og Neanderdalsmenn áttu sér langa sögu blöndunar,“ sagði hann.
Neanderdalsmenn voru sú manntegund sem var einna skyldust okkur nútímamönnunum. Leiðir tegundanna skildu fyrir um 500.000 árum en þá þróuðust þær út frá sömu tegundinni.
Fyrir rúmum áratug komust vísindamenn að því að Neanderdalsmenn og nútímamenn, sem héldu frá Afríku til Evrópu, hefðu eignast afkvæmi saman. Erfðamengi nútímamanna, utan Afríku, inniheldur DNA úr Neanderdalsmönnum og er það 1% til 2% af erfðamenginu.
En vísindamenn vita lítið um hvort DNA úr nútímamönnum hafi komist inn í erfðamengi Neanderdalsmanna. Aðalástæðan fyrir því er að það eru aðeins þrjú þekkt gæða sýni til af heildarerfðamengi Neanderdalsmanna.
