„Eitt sem þú munt læra um dómsalinn minn er að ég er ekki dót og læt ekki leika á mig,“ sagði dómarinn Kenneth King í Detroit við nemendur í ósköp hversdagslegri vettvangsferð sem þó endaði með að einn nemandi var hnepptur í járn.
Unglingar hafa skiptar skoðanir á vettvangsferðum. Þessi tiltekna ferð var á vegum umhverfissamtakanna The Greening of Detroit. Dómarinn tók því óvenju persónulega þegar ein stúlka í nemendahópnum átti erfitt með að halda augunum opnum.
„Ef þó sofnar einu sinni enn í dómsalnum mínum þá læt ég færa þig í hald, skilur þú það,“ sagði dómarinn var áberandi pirraður á upptöku frá atvikinu.
Stúlkan, sem er 16 ára, lét sér þó ekki segjast og hélt áfram að dotta. Þá lét dómarinn handjárna stúlkuna og lét hana klæðast fangabúning.
„Það voru stælarnir í henni og framkoma sem fóru í mig,“ sagði dómari við fjölmiðla. „Ég vildi ná til hennar, sýna henni hversu alvarlegt málið var og hvernig fólki ber að haga sér í dómshúsi.“
Hann hótaði stúlkunni svo að senda hana í unglingafangelsi, áður en hann sleppti henni.
„Ég geri það sem þarf til að ná til þessara krakka til að tryggja að þau endi ekki sem sakborningar fyrir framan mig í framtíðinni.“
The Greening of Detroit hafa gefið yfirlýsingu í málinu þar sem segir að stúlkan sé í miklu áfalli. Vissulega sé ákveðið gildi í því að kenna krökkum að bera virðingu fyrir yfirvaldinu en þessi aðferð hafi farið út fyrir skynsemismörk.
„Hann hefði frekar átt að biðja hópinn að yfirgefa dómsalinn ef þau voru með stæla.“
Dómstjóri hefur gefið yfirlýsingu þar sem segir að framkoma King endurspegli ekki viðhorf allra í dómshúsinu. Málið sé til rannsóknar og verður tekið á því innanhúss.
King stendur þó við framkomu sína og segist hafa sett sig í samband við fjölskyldu stúlkunnar og boðist til að gerast leiðbeinandi stúlkunnar.
