Unglingurinn sem stakk þrjár stúlkur til bana og særði átta önnur börn í hræðilegri hnífaárás á dansnámskeiði fyrir börn í Southport á Englandi fyrir skömmu hefur nú verið nafngreindur og myndbirtur í breskum fjölmiðlum. Pilturinn heitir Axel Rudakubana og verður 18 ára í næstu viku. Hann hefur nú verið ákærður fyrir morð og líkamsárásir. Dómari ákvað að birta nafn hans til að koma í veg fyrir að rangar upplýsingar um geranda í málinu færu í dreifingu. Metro og fleiri fjölmiðlar greina frá þessu.

Fimm börn eru enn á sjúkrahúsi vegna árásarinnar en þær Alice Dasilva Aguiar 9 ára, Bebe King 6 ára og Elsie Dot Stamcombe 7 ára létust af sárum sínum. Námskeiðið sem börnin sóttu snerist um dansa við tónlist Taylor Swift, en söngkonan fræga hefur lýst yfir mikilli hryggð yfir atburðinum.

Axel er fæddur í Cardiff en foreldrar hans eru innflytjendur frá Rúanda. Hann er sagður vera einrænn og hæglátur piltur. Hann á bakgrunn í tónlist og söngleikjum eða því sem kallað er „musical theatre“ í bresku fréttamiðlunum.

Nágrannar Axels og fjölskyldu hans segja að aldrei hafi stafað nein vandræði af honum í hverfinu. „Ég trúi því ekki að þetta hafi gerst,“ segir einn nágranni fjölskyldunnar. Talið er að foreldrar Axels fari núna huldu höfði.

Axel hefur þegar komið fyrir dómara en mál hans verður næst tekið fyrir hjá dómstóli í Liverpool þann 25. október. Fram að réttarhöldum verður Axel í gæsluvarðhaldi í unglingafangelsi.