Wrangel eyja er í norðanverðu Rússlandi og þar héldu mammútar til í heil 6.000 ár eftir að þeir dóu út á meginlandinu. Áður var talið að þeir hefðu dáið út hægt og rólega af völdum innræktunar.
Live Science segir að í nýrri rannsókn komi fram að innræktun hafi ekki verið ástæðan fyrir að mammútarnir dóu út. Rannsóknin leiddi í ljós að mammútarnir á eyjunni hafi flestir verið afkomendur átta dýra og hafi þeir orðið um 300 þegar best lét. Rannsóknin hefur verið birt í vísindaritinu Cell.
Í tilkynningu frá Love Dalén, aðalhöfundi rannsóknarinnar og þróunarerfðafræðingi, segir að vísindamennirnir geti af miklu öryggi hafnað þeirri hugmynd að stofninn hafi verið of lítill og því dæmdur til að deyja út af erfðafræðilegum ástæðum. „Þetta þýðir að það var líklega einhver tilviljanakenndur atburður sem gerði út af við dýrin og ef þessi tilviljanakenndi atburður hefði ekki átt sér stað, þá væru mammútar enn til,“ segir hann.
Hann segir að það sé enn ráðgáta hvað gerðist og ekki sé vitað af hverju dýrin dóu út eftir að hafa þraukað í 6.000 ár en líklega hafi eitthvað gerst mjög skyndilega. Hann segist telja að enn sé von um að komast að hvað gerðist en hann geti þó ekki lofað því.
