Sukhoi Su-57 heitir vélin en hún er illsjáanleg á ratsjám og búin allri þeirri tækni sem nauðsynleg þykir. Byrjað var að þróa vélina fyrir margt löngu og var hún fyrst tekin í notkun árið 2010. Talið er að Rússar eigi um 30 slíkar vélar.
John Baun, sérfræðingur hjá Mitchell Institute og fyrrverandi ofursti í bandaríska flughernum, segir við Business Insider að þetta geti gefið tvennt til kynna. Annað hvort séu Rússar hræddir við að úkraínska hernum takist að skjóta vélarnar niður eða að Rússar séu að spara vélarnar fyrir komandi tíma og hugsanleg átök við aðildarríki NATO.
Undir þetta tekur Michael Clarke, breskur öryggisráðgjafi, segir að Rússar væru án efa í betri stöðu í Úkraínu ef þeir hefðu notað allt sitt vopnabúr þar. „Ef þeir myndu henda öllu sínu í Úkraínu þá verður ekkert eftir ef til átaka kemur við NATO.“
Úkraínumenn hafa verið duglegir að skjóta niður rússneskar orrustuflugvélar yfir Úkraínu en betur má ef duga skal. Christopher Cavoli, bandarískur herforingi, sagði við bandaríska þingnefnd í apríl síðastliðnum að Rússar hefðu aðeins misst tíu prósent af flugflota sínum í Úkraínu og það gefi til kynna að þeir séu enn í nokkuð sterkri stöðu.